صوت البلد للأنباء –
لا شك أن الغيرة عند المرأة شئ أساسي في تركيبتها العقلية والذهنية والنفسية.. ولكن هل تعلمين سيدتي أن الغيرة تجعل منك امرأة مصابة بعقدة الاضطهاد.؟ وأيضاً تقلل من شأنك بين قريناتك وأنك تفتقدين الثقة في نفسك عندما ترين زوجك ينظر إلى غيرك حتى لو كانت أجمل منك 63 مرة..
ولذلك عليكِ أن تتمالكين نفسك في هذا المضمار.. وأن تتحكمي فى غيرتك هذه حتى لو رأيتي زوجك بأم عينيك يجلس جلسة رومانسية مع فتاة أخرى أجمل منك 80 مرة فقط والجروسون هاجم عليهم بـ شجرة واتنين ليمون وواحد بيعزف كمنجة..
اوعي تخلي شيطانك يوزك إنك تتنكري في زي الجرسون وتحطيلهم سم فى الليمون قبل ما يشربوه لانه ساعتها الناس هتقول انك قتلتيها عشان هي أجمل منك 135 مرة مش 80 بس.. أو عقلك يقولك إنك تروحي تشتري زجاجة مية نار وترشيها على وشها عشان تتشوه وما يبقاش حد أحسن من حد ووقتها تقدري تحطي ايدك في وسطك وتواجهي جوزك وتقوليله بكل شموخ (فيها ايه أحسن مني دي عشان تسيبني وتبصلها.؟!).. طبعاً كل الكلام ده هيقلل من شانك ويظهرك بمظهر الضعيفة الفاقدة للثقة فى النفس..
أما الحل الأمثل فى هذا الموقف هو إنك تروحي بيتك بعد ما تكوني مليتي عينيكي من البنت اللي أجمل منك 87 مرة دي وبعدين تقفي أمام المراية وتبصي لنفسك وتشوفي إيه اللى ناقص فيكي والمميز فيها خلى جوزك يبصلها واعمليه – صحيح هو عصر المعجزات انتهى ولكن يكفيكي شرف المحاولة – وانتظري جوزك على أحر من الجمر عشان تفاجئية بالنيولوك الجديد.. وفي هذه الحالة لن تخرج النتيجة عن احتمال من اثنين..
إما أن زوجك هيشوف العفريت اللى طلعله فجأة وهيجيله صرع وهارت أتاك ومصران أعور وجلطة دماغية وهيموت وبكده يبقى انتى انتصرتي لأنك ما سبتهوش لواحدة تانية تاخده منك.. والاحتمال الآخر هو إنه يجيله صرع ومصران أعور برضو بس من غير هارت أتاك ولا جلطة دماغيه وساعتها هيرمي عليكي يمين الطلاق وبكده يبقى فزتي بالشقة والمؤخر والعفش وفي نفس ذات الوقت ما نزلتيش بمستواكي ودخلتي في منافسة مع واحدة أجمل منك 185.5 مرة بس..